Duke filluar nga ky numër herë pas here do të botojmë biografinë e shkurtër të presidentëve të Shteteve të Bashkuara të Amerikës, sipas rradhës që ata kanë shërbyer në këtë post të lartë.

Për të kuptuar natyrën e re dhe të ndryshme të këtij posti me atë të drejtuesve më të lartë në vendet e ndryshme të botës, në kohën e shpalljes së pavarësisë së Shteteve të Bashkuara, po citojmë një shënim të gazetës The Saturday Evening Post në vitin l931 lidhur me problemin që doli për mënyrën se si i duhej drejtuar presidentit:

"Vetë emri me të cilin i duhej drejtuar George Washington-it ngjalli një diskutim të zjarrtë. "Lartësia e tij, President i Shteteve të Bashkuara të Amerikës dhe Mbrojtës i tyre" u përzgjodh nga komiteti i Senatit, por meqë komiteti i Dhomës refuzoi ta pranonte këtë titull, që të kujtonte vendin amë, "Zoti President" u përcaktua si forma më korrekte një herë e përgjithmonë".

Për të kuptuar rëndësinë e madhe të atij që mban këtë post, si dhe përgjegjësitë e tij të mëdha, na lejoni të citojmë një thënie të Albert Atwood-it në gazetën Post të datës 3 qershor l933:

"Në ndryshim nga Kongresi, ai është gjithmonë në sesion. Ai është tendosja e pallogaritshme e udhëheqjes më të lartë dhe e përgjegjësisë finale njëherësh. Për të nuk ka alibi. Kur të gjithë ekspertët dhe këshilltarët të kenë ikur, ai duhet të mbështetet në mënçurinë e tij".

George Washington është i njohur si "Babai i Kombit". Ai qe presidenti i parë i Shteteve të Bashkuara dhe si i tillë i dha i pari tonin kësaj zyre.

Ai lindi më 22 shkurt të vitit l732 në Westmoreland Conty, në Virginia.

Në fëmijëri ai kishte qejf që kohën më të madhe ta kalonte jashtë shtëpisë, ndërsa në rini u shqua si kalërues i shkëlqyeshëm.

Në vitin l775 filloi Revolucioni Amerikan dhe ai u emërua Kryekomandant i Ushtrisë Amerikane.

Sot mendoht se ai ka qenë një gjeneral i mirë, por jo i madh. Ai humbi shumë beteja, por qe gjithnjë në gjendje ta mbante ushtrinë në fushë. Pavarësisht nga vështirësitë e shumta - uria, të ftohtit, mungesa e parave për të blerë armë dhe municion, George Washington-i qe në gjendje t'i frymëzonte njerëzit e tij dhe ata ishin të bindur se, të udhëhequr prej tij, nuk do të humbisnin kurrë.

Pasi përfundoi lufta, u bë e qartë shumë shpejt se shtetet e formuara sërishmi nuk mund të mbijetojnë si njësi të pavarura. Njerëz nga shtete të ndryshme u mblodhën dhe hartuan një plan për qeverisjen. Ky plan ishte Kushtetuta e Shteteve të Bashkuara, që kërkonte një qeveri të fortë qendrore dhe një president për të përfaqësuar të gjithë popullin.

Në postin e presidentit të Shteteve të Bashkuara të Amerikës u zgjodh George Washington-i. Ai u inaugurua si President i parë i Shteteve të Bashkuara në vitin l789 në Old City Hall në New York, që u bë kapitoli i parë i kombit.

George Washington-i zgjodhi një kabinet me njerëz të kualifikuar dhe çdo vendim që merrte e peshonte mirë. Ai e dinte se një qeveri, që të jetë e fortë, duhet të forcojë ligjet. Në të njëjtën kohë, ai dërgoi trupa në Pensilvani për të ndalur rebelimin që kishte nisur atje.

Washington-i u zgjodh president edhe për një mandat të dytë. Iu lutën që të shërbente edhe në një mandat të tretë, por ai nuk pranoi, duke besuar se dy mandate janë koha më e gjatë që një njeri mund të shërbejë në postin e presidentit. Ky vendim, për të shërbyer vetëm dy mandate, u bë një precedent për presidentët pasardhës dhe nuk u shkel vetëm se në vitin l940, kur Franklin D. Roosevelt u zgjodh për një mandat të tretë.

George Washington-i vdiq me l4 dhjetor l799 dhe është varrosur në Mount Vernon, në Virginia.

Back to Top